На 23.01 2023 од страна на полициски службеници од СВР Струмица во содејство и координација со Оддел за криминалистичка полиција, Сектор за општ и насилен криминал лишен е од слобода П.И.(25) од Струмица. Тој се сомничи дека на 20.01.2023, откако побарал и не добил пари од М.Б.(83) од Струмица, со која бил во роднинска врска, ја нападнал, а од здобиените повреди таа починала. Потоа П.И. одзел пари и предмети од домот на М.Б., од кои дел биле пронајдени при претресот извршен по наредба на ОЈО Струмица. П.И. е приведен во полициска станица и при службен разговор го признал делото, а од страна на СВР Струмица против лицето е поднесена  кривична пријава до ОЈО Струмица, изведено е пред  Основен суд Струмица и побарана е мерка притвор.

Министерката за труд и социјална политика, Јованка Тренчевска заедно со  градоначалникот на општина Струмица, Костадин Костадинов и Директорката на државен санитарен и здравствен инспекторат, Рената Младеновска го отворија инклузивното игралиште во клон 3 од јавната детска установа „Детска Радост“ во Струмица.

„Плод на успешната соработка со Министерството за труд и социјална политика е и новата градинка „Виножито“, најголема во државата и прва во Струмица по 40 години, а за чија инфраструктура општината вложи 20 милиони денари. Во интерес и на децата и нивните родители, го продолжуваме Јавниот повик за ослободувањето од плаќање на надомест за престој на деца на самохраните родители во градинките „Детска радост“ и „Виножито“ кои земаат плата пониска од просечната месечна плата во државата и невработени лица со цел што поголем број деца да бидат опфатени со оваа мерка“, вели градоначалникот Костадинов.

„Како Министерство се залагаме секое дете да добива соодветна грижа и услови за соодветен раст и развој, затоа се градат се повеќе градинки, се зголемуваат капацитетите со цел секое дете да има можност да биде дел од предучилишното воспитание и образование“ рече Министерката во своето излагање.

Таа посочи дека особено е запазена социјалната компонента во градинките и можноста на секое дете да биде вклучено во детската игра.

„Ме радува тоа што со овозможувањето на вакви игралишта придонесуваме кон тоа раскажувањето на децата за нивните денови во градинката  да не бидат проследени со негативни чувства на неприфаќање, туку среќни детски спомени “ истакна Тренчевска.

При посетата на градинката од страна на Министерството за труд и социјална политика во соработка со Државниот санитарен и здравствен инспекторат беа доделени играчки за градинката.

Синоќа во 20.54 часот во Полициска станица Струмица било пријавено дека настанал пожар во куќа сопственост на А.Е.(63) на улица „Пиринска“ во Струмица, во која било пронајдено и едно починато лице. Од страна на територијалната противпожарна единица Струмица пожарот бил изгаснат, а увид на местото ќе биде вршен во текот на денешниот ден од страна на Јавен обвинител од Основното јавно обвинителство Струмица, информира СВР Струмица.