Со германска експертиза ќе се унапредува јавниот превоз во Струмица, директорот Митушев на средба со делегацијата од Шланген
Германската делегација од Општина Шланген, заедно со домаќинот, градоначалникот на Струмица, Петар Јанков, беа во посета на ЈСП „Струмица транспорт“. Директорот на ЈСП „Струмица-Транспорт“ Ване Митушев ги претстави актуелната состојба, функционирањето и развојните потреби на јавниот превоз во Струмица.
Делегацијата, во чиј состав има и четворица експерти за
јавен превоз и одржлива мобилност, имаше можност непосредно да се запознае со
организацијата на системот, со досегашните резултати, но и со предизвиците што
го условуваат неговиот понатамошен развој.
Претпријатието располага со 10 целосно електрични
автобуси, кои се организирани во 12 автобуски линии и опслужуваат мрежа од 118
автобуски постојки, при што превозот ги опфаќа поголемиот дел од населените
места во општината.
„Ова е значајна основа за развој на современ и еколошки
јавен превоз, но нашата цел е системот дополнително да го унапредуваме. Пред
нас се предизвици поврзани со зголемувањето на возниот парк, модернизацијата на
автобуските постојки, воспоставувањето сопствен сервисен центар и подобрувањето
на енергетската инфраструктура. Особено важно е да ги разгледаме можностите за
користење обновливи извори на енергија и проширување на јавниот превоз кон
другите општини во регионот. Размената на искуства со германските експерти е
можност да добиеме стручни насоки и конкретни препораки за следните развојни
чекори на претпријатието“, истакна Митушев, директорот на ЈП
„Струмица-Транспорт“.
Разговорите беа насочени и кон можностите за проширување
на мрежата на јавен превоз надвор од општинските граници, подобрувањето на
поврзаноста со соседните општини и примената на современи европски практики во
управувањето со јавниот транспорт.
Посетата на германските експерти претставува можност за
стручна размена и согледување на конкретни решенија кои би придонеле за
поголема ефикасност, функционалност и одржливост на јавниот превоз во Струмица.
Делегацијата од Шланген ќе престојува во Струмица до 13 ноември, а се очекува стручната размена да резултира со конкретни препораки и можности за долгорочна соработка меѓу двете општини.