РАДОВИШ – До нашата редакција пристигнаа фотографии и загрижувачки допис од жителите кои живеат на улицата „Коџа Баир“ (во близина на турските гробишта) во Радовиш. Граѓаните алармираат за крајно запоставената состојба на тротоарите на оваа улица, која секојдневно го загрозува нивниот живот и безбедност.
Според информациите и фотографиите испратени од загрижен жител, пешачењето по тротоарите на оваа делница е буквално невозможно.
⚠️ Со какви проблеми се соочуваат граѓаните?
- Блокирани тротоари: Просекот наменет за пешаци е преплавен со натрупани камења, земја и градежен шут.
- Заборавени возила: На самиот тротоар паркирано возило .
- Дива вегетација и отпад: Тротоарите се обраснати со неискастрени грмушки и висока трева, а дополнителен проблем е и сметот кој несовесни граѓани секојдневно го фрлаат на ова место.
„Пешаците се принудени да се движат по самиот коловоз бидејќи немаат пристап до тротоарите. Со тоа директно го ризикуваат својот живот и се изложени на опасност да бидат прегазени, со оглед на тоа што по оваа улица често се вози со многу поголема брзина од дозволената“, се вели во дописот од револтираните граѓани.
🏛️ Апел до надлежните институции
Жителите јавно бараат и апелираат до Општина Радовиш и надлежните јавни претпријатија под итно да преземат мерки за расчистување на тротоарите, отстранување на хаварисаното возило и кастрење на дивата вегетација, со цел да се врати безбедноста на пешаците пред да се случи некоја несакана несреќа.