Семестрална теренска вежба на тема „Ниска станбена структура – домување покрај река“, се одржа во Радовиш
Семестрална
теренска вежба на тема „Ниска станбена структура – домување покрај река“, вчера 11 март се одржа во Радовиш, во соработка помеѓу Центарот
за културното наследство „Самун и Каднка“ од Радовиш и Кабинетот за
проектирање на станбени згради и колективно домување од Архитектонскиот
факултет при Универзитетот „Св. Кирил и Методиј“ во Скопје.
Во рамки на
активностите, студентите по архитектура, заедно со наставниот кадар, реализираа
теренски увид на неколку локации долж течението на Стара Река, кои ќе
претставуваат предмет на нивната семестрална проектна задача.
По
завршувањето на летниот семестар, изработените студентски трудови ќе бидат
јавно презентирани пред радовишката јавност во еден од расположливите јавни
простори во градот.
Во текот на
работниот ден се одржаа и разговори со претставници на Општина Радовиш за
актуелните прашања поврзани со старата школска зграда, при што професорскиот
колегиум го изнесе својот став во врска со оваа актуелна тема од значење за
градот.
Општина Радовиш изрази интерес за воспоставување институционална соработка со Деканатот на Архитектонскиот факултет при УКИМ, која во наредниот период се очекува да биде формализирана со потпишување на меморандум за соработка.
Во рамки на
посетата, студентите ја посетија црквата „Св. Пророк Илија“, разгледаа
неколку значајни индивидуални станбени објекти, и присуствуваа на
предавање посветено на изградбата и значењето на храмот „Св. Троица“.
„Општина Радовиш обезбеди логистичка поддршка за организирањето на настанот и беше домаќин на овој едукативно-културен настан“, вели Георги А. Кочев од ЦКН Радовиш, кој беше организатор на овој настан.