Обезбедени средства за оградување и партерно уредување на училишниот двор во Ангелци
Оградување и партерно уредување на дворот на училиштето во село Ангелци, Општина Василево. Средствата за негово целосно уредување се обезбедени, преку Министерството за транспорт и врски и дел од општината.
Како што информира градоначалникот Славе Андонов, уредувањето на училишниот двор опфаќа: изградба на детско игралиште со нови модерни содржини; опрема за вежбање и рекреирање; нови зелени површини; нова урбана опрема(клупи и корпи за отпадоци); изградба на ограден ѕид; поставување на метална ограда и изградба на пристапни патеки.
„Децата се иднината на секое општество. Тие заслужуваат безбедни и инспиративни простори за игра и престој“, вели градоначалникот Андонов.
Средствата за реализација на сите наведени активности, според пресметката изнесуваат 4.353.893 денари од кои 2.440.000 денари се обезбедени преку Проектот за поврзување на локани патишта (ППЛП) на Министерството за транспорт, со заемот од Светска банка, и 1.913.893 денари од Буџетот на Општина Василево, за што Советот на општината на една од своите седници, донесе одлука. -Изборот на компанија изведувач на активностите на терен и компанија за вршење надзор на активностите, беа последните активности, што значи, дворот на ПУ „Гоце Делчев“ во с. Ангелци набргу ќе почне да го менува својот лик, додава градоначалникот Андонов во објава на социјалните мрежи.