Одржан настан во македонскиот КИЦ во Загреб – промовирана научната монографија „Во потрага по фотографите Арсовски“ и отворена изложбата „Арсовски – Фотографи“
МАКЕДОНСКИ КУЛТУРНО ИНФОРМАТИВЕН ЦЕНТАР ВО ЗАГРЕБ
Во Културно-информативниот центар на Македонија во Загреб беше промовирана монографијата „Во потрага по фотографите Арсовски“ и отворена изложбата „Арсовски – Фотографи“, посветена на досега непознатото, но вредно фотографско наследство на семејството Арсовски. Автор и уредник е д-р Ива Просоли, а публикацијата е двојазична, со текстови од македонски и хрватски истражувачи.
Изложбата и монографијата претставуваат значаен придонес во историјата на македонската и хрватската фотографија. Проектот е реализиран во соработка со Музејот на уметности и занаети од Загреб и Музејот на град Скопје, а ќе биде претставен и во Националната галерија во Скопје.
Фотографското семејство Арсовски, активно во Скопје и Загреб, вклучува две генерации фотографи, почнувајќи од Васил Поп-Арсов, па неговите синови Коста и Владимир. Нивните студија „Арсиќ“ и „Електрофот“ биле важни центри во меѓувоениот период. Делото на Арсовски опфаќа урбани сцени, обичаи, мода и секојдневен живот, и денес претставува значаен документ за колективната меморија.