Администрацијата
на Бајден забрани увоз и продажба на нова телекомуникациска опрема од кинеските
компании Huawei Technologies и ZTE, бидејќи тие претставуваат „неприфатлив
ризик“ за американската национална безбедност. Федералната комисија за
комуникации во петокот соопшти дека донела конечни одлуки со кои се забранува
продажба и увоз на опрема од кинескиот производител на опрема за надзор Daha
Technologies, производителот на опрема за видео надзор Hikvision Digital
Technology и технолошката компанија Hytera Communications. Овој потег е
продолжување на репресијата на Вашингтон против кинеските технолошки гиганти
поради стравувањата дека Пекинг може да ги искористи тие компании за да ги
шпионира Американците.
Овие нови
одлуки се важен дел од нашите тековни активности за заштита на Американците од
закани за националната безбедност кои вклучуваат телекомуникации, рече
претседателката на комисијата Џесика Розенворсел во изјавата.
Huawei не
сакаше да ја коментира одлуката, додека другите компании не одговорија веднаш
на барањето на Ројтерс. Инаку, таа комисија во јули 2021 година објави дека
размислува за забрана за одобрување за сета опрема од сите фирми на списокот.
Тоа следеше откако пет кинески компании беа означени како закани за
националната безбедност во март 2021 година, според законот од 2019 година,
чија цел беше заштита на американските комуникациски мрежи. Сите четворица
комесари во агенцијата, двајца републиканци и двајца демократи, ги поддржаа
последните одлуки.