Претседателскиот кандидат на #Левица – Билјана Ванковска, вечерва ја продолжи својата предизборна кампања во Кавадарци и ја промовираше својата предизборна програма во Кавадарци, на народен митинг. Заедно со претседателот на #Левица – Димитар Апасиев и носителот во ИЕ 4 – Саше Јанчев, се обратија пред Кавадарчани и испратија моќни пораки.

„Мојата противкандидатка е постојано фаворизирана како иден претседател, а што ни нуди мојата колешка? Внесување на Бугарите во Устав со одложено дејство. Тоа е исто како да ви кажат, „ама вас нема да ве боли, ќе ги боли вашите деца“. Втор го фаворизираат Стево, кој се фали дека направил добра работа што не внел во НАТО, а што добро направил со тоа, освен да плаќаме за милитаризација. Сето ова што тие го нудат е сосема различно од мојата програма. Ние мора сите нив да ги расчистиме бидејќи се сијамски близнаци.

Јас ви ветувам дека 24 ќе го дочекам достоинствено, спокојно, мирно. Јас имам идеја, идеологија, меѓутоа битката ќе биде долга. А, дека ќе победиме, секако ќе победиме. Гледам дека „баукот“ на Левица се уште ги плаши луѓето иако интимно ја сакаат. Ние чекориме незапирливо. Црбвениот бран, цунамито, надоаѓа и нека му ја мислат. Ќе победиме”, порача Ванковска во својот говор.

Претседателот на Левица Димитар Апасиев се осврна на, како што рече, она што ни го продаваат како европски вредности. Кажа дека оваа Европа, ваква каква што е, нема никакви вредности. Истакна дека западните општества кои се декларираат како најдемократски, во моментов се општества на бездомници, општества со најголем број затвори и затвореници, општества со луѓе кои немаат здравствена заштита.

„Ова ли се тие општества кон кои ние стремиме? Ова ли се тие вредности? Само оној кој не гледа подалеку од носот, нема алтернатива”, истакна Апасиев.

Од Прилеп ја испраќаме пораката за обединување! На Македонија и е потребна нова опција која ќе ги обедини сите граѓани и ќе работи исклучиво за граѓаните – таа опција е Движењето ЗНАМ – За наша Македонија, ова го истакна кандидатот за претседател Максим Димитриевски пред прилепчани.

-Затоа на следните избори СДСМ ќе изгуби, ВМРО-ДПМНЕ нема да победи, а Македонија ќе добие претседател што го обединува народот додаде Димитриевски.  

Тој притоа во својот говор меѓудругото рече: Нема да дозволам македонците да бидат граѓани од втор ред во својата држава, несакам да плаќам данок за Груби и Ахмети да играат фудбал во канцеларии финасирани од наши пари.

Носителот на кандидатска листа во ИЕ 4 Миле Цеков, кој во чекор го следи кандидатот за претседател Максим Димитриевски,  вели дека движејќи се насекаде низ Македонија овие денови, гледаат само црнила, граѓаните се се посиромашни и понесреќни.

„Драги пријатели после 30 години имате нова опција, Движењето ЗНАМ -За наша Македонија и Максим Димитриевски за претседател“ истакна Цеков во Прилеп.

 Тој додаде дека Македонија треба да биде самоодржлива земја и нулта толеранција за корупција, Македонија да биде мултиетничка држава но македонецот на прво место.

Претходно Движењето ЗНАМ го посетија и Демир Хисар и Кривогаштани.

Кандидатката за претседател на државата од ВМРО-ДПМНЕ вечерва во обраќањето на митингот во Општина Карпош ги претстави насоките по кои ќе се раководи во извршувањето на функцијата доколку ја добие довербата од граѓаните. 

„Морам да ги охрабрам жените да се занимаваат со политика. Политиката е во женски род. Дури маж и жена прават човек, не смее Македонија да се откажува од 50 проценти ум, знаење, креација, посветеност како што сме посветени секаде, сигурно ќе бидеме посветени и во негувањето на Македонија, а таа ќе биде горда на нас и на вас сите“, рече Гордана Силајновска Давкова.

Таа рече дека за неа еден од најважните приоритети е доброто образование и оти нема подобра инвестиција од тоа.

„Мое решение – во претседателскиот кабинет и околу мене ќе формирам совет за млади. Доста со тезите дека на младите им припаѓа иднината. Младите мора и сегашноста да ја земат во своите раце. Една умна влада, а се надевам дека таква ќе биде бидејќи нема веќе избор – до ѕидот на срамот сме доведени зошто дијагнозата за нас како што гледате на Фридом хаус е што – цикличен хибриден режим, вртење во круг. На тоа мора да се стави крај и мораме да исчекориме“, рече Силјановска Давкова.