Учениците од
ООУ „Гоце Делчев“, Василево организираа еко модна ревија во која моделите со
кои продефилираа беа направени од отпадни материјали. Пораката беше јасна:
заштита на животната средина преку „враќање во живот“ на еднаш употребени
материјали. Учениците потсетија дека постојат безброј начин за реупотреба на
веќе искористените материјали кои со рециклирање после нивната првична намена и
употреба, повторно може и треба да бидат искористени како суровина за изработка
на нови материјали и предмети со соодветна употребна вредност.
На ревијата
беше присутен и градоначалникот на општина Василево Славе Андонов, кој својот
став го сподели преки социјалните медиуми: „Модна ревија
од отпадни материјали – креативност со еко порака! Во рамките на Еко месецот, учениците од ООУ „Гоце Делчев“
Василево, организираа уникатна модна ревија изработена од отпадни материјали.
Со многу креативност, труд и тимска работа, тие покажаа дека и од отпад може да
се создадат вистински модни дела“, порача Андонов кој воедно изрази
благодарност до сите вклучени во ова како што рече „уникатно еко доживување“. „Ревијата имаше за цел да ја подигне свеста за
рециклирање и повторна употреба, испраќајќи силна порака за заштита на
животната средина. Голема благодарност до учениците, наставниците и сите
вклучени во ова уникатно еко-доживување“, стои во споделениот ФБ статус, https://www.facebook.com/vasilevo24.
Еко модната
ревија беше подготвена во соработка со наставниците и родителите и истата се
одржа во големата сала во Домот на
културата во Василево.
Ова е само една од планираните активности во еко месецот за подигање на јавната свест за значењето на поединецот во зачувувањето на животната средина и планетата Земја како наш заеднички дом. Во подготовка е најмасовната еко акција за собирање на отпад на повеќе локации низ населените места на општина Василево – Генералка викенд која ќе се одржи на 08.05.2026 година.