Connect with us

Струмица

Започна јубилејното 20-то издание на меѓународниот филмски фестивал „Астерфест“ во Струмица

Media Press

Објавено на

Синоќа, во НУЦК „Антон Панов“ во Струмица, во присуство на видни гости и љубители на филмот, се отвори јубилејното 20-то издание на меѓународниот филмски фестивал „Астерфест“.

На самото отворање беше македонската премиера на краткометражниот оскаровец „Јас не сум робот“ на Викторија Вармердам и на „Мечокот по име Војтек“ на Ијан Гарднер, добитник на БАФТА.

Модераторот на вечерта, Сузана Мицева, рече дека „Астерфест“ не е само фестивал на кој се прикажуваат филмови – тој е платформа за авторите кои заслужуваат да бидат слушнати и видени, за приказните кои нè трогнуваат, нè провоцираат, нè менуваат и секој филм што ќе го видиме на овогодишното издание е резултат на нечија посветеност, визија, но и борба да се остане верен на себе.

Таа ја прочита и пораката на градоначалникот Костадин Костадинов, во која тој го истакна местото на „Астерфест“ како манифестација што со својата автентичност и креативност стана еден од клучните белези на културната сцена во Струмица и вети продолжување на поддршката, како доказ за заложбата на Општина Струмица за развојот на културата и уметноста.

Емил Рубен, добитникот на специјалната награда, плакета на „Астерфест“ за долгогодишни врвни актерски остварувања во македонскиот и балканскиот филм и еден од нашите најмаркантни актери, со возбуда евоцираше спомени од неговото плодно 70-годишно филмско искуство и зборуваше за неговиот посебен респект кон Струмица, како град на значајни личности и творци. Плакетата му ја врачи основачот и директор на „Астерфест“ Горан Тренчовски, македонски режисер и писател.

Денес претпладне е традиционалната посета на филмските гости во Манастирот „Воведение на Пресвета Богородица Елеуса“ во Велјуса.

По вчерашното врнежливо време, вечерните проекции треба да продолжат да се одвиваат во Амфитеатарот во Градскиот парк во Струмица. Ќе се прикажат балканската премиера на „Самотија“ на Бошко Боби Грубиќ, „Сок од портокал“ на Александар Атане, „Браќа по застава“ на Пеп Стојановиќ, „Лаеж“ на Бранислав Милатовиќ, „Мајчински инстинкти“ на Ема Зафировска, како и изборот од македонската продукција, меѓу кои „Амра“ на Васил Христов, „Избор“ на Марко Црногорски, „Состојба на умот“ на Александра Кардалевска и „Турбо-нет“ на Надежда Панов.

Утре, со почеток во 11:00 ч., во „Јуроп хаус“ ќе се одржи и промоција на новото коло од едицијата филмолошка и уметничка литература „Словенски Орфеј“, на која ќе зборуваат и Зоран Стефановиќ и Мимоза Рајл, а утревечер во 20:30 ч., по прогласувањето на наградите од жирито во состав на филмските автори: Клара Дошлов, Сезер Салихи и Ице Виранов, ќе има специјална проекција на дигитализираната копија од Кинотеката на Македонија на среднометражниот филм „Писмо“ на Васил Христов, во чест на Емил Рубен и како одбележување на 25 години од снимањето.

Струмичкиот „Астерфест“ ќе трае до 8 август, под мотото „Филмски крстопати“, посветен, како и секогаш, на авторскиот филм.

прикажи повеќе

Струмица

Општина Струмица со награден фонд до 130.000 д. за најдоброто идејно решение за Градски плоштад ,,Гоце Делчев“ – Струмица

Media Press

Published

на

ПОТСЕТУВАЊЕ ДО ГРАЃАНИТЕ: РОКОТ ЗА ИДЕЈНИТЕ РЕШЕНИЈА ЗА ГРАДСКИОТ ПЛОШТАД „ГОЦЕ ДЕЛЧЕВ“ Е ПРОДОЛЖЕН ДО 15 ДЕКЕМВРИ 2026 ГОДИНА

Општина Струмица ги потсетува граѓаните, архитектите и сите заинтересирани учесници дека рокот за доставување идејни архитектонски решенија за реконструкција и урбан дизајн на Градскиот плоштад „Гоце Делчев“ е продолжен.

Предлозите можат да се достават најдоцна до 15 декември 2026 година, до 12 часот, по пошта или лично во архивата на Општината, канцеларија бр. 20. Конкурсот е јавно достапен на Електронскиот систем за јавни набавки (www.e-nabavki.gov.mk), каде заинтересираните можат да ја најдат целокупната документација.

Најдобрите идејни решенија ќе ги избира стручна жири-комисија.

Општина Струмица обезбеди парични награди во износ од 130.000 денари за првата, 60.000 денари за втората и 40.000 денари за третата награда.

Градскиот плоштад „Гоце Делчев“ последен пат беше целосно реконструиран во 2010 година. По повеќе од 15 години, Општината отвора нова можност за осмислување на неговиот изглед и содржина, со визија за поубав, пофункционален и попривлечен централен простор, место кое ќе одговори на потребите на граѓаните, ќе поттикнува дружење и ќе продолжи да биде срцето на јавниот и културниот живот во Струмица.

Со овој конкурс, Општина Струмица прави чекор кон ново урбано лице на градот, создадено со современи архитектонски идеи и визија за иднината.

Ги повикуваме сите заинтересирани да се вклучат и да го дадат својот придонес во обликувањето на новото лице на центарот на Струмица.

Прочитај повеќе

Струмица

Општина Струмица денес ја одржа 18-та седница на Советот на општина Струмица

Media Press

Published

на

Нови развојни планови за Струмица, финансиска стабилизација и инвестиции во 2027 година!

На денешната 18-та седница на Советот на Општина Струмица е усвоен Планот на програмите за развој за 2027 година, со кој се поставува основата за реализација на капиталните инвестиции во наредната година.

Усвоени беа и ребалансот на буџетот за 2026 година, извештајот за неговото извршување за третиот квартал, како и измените и дополнувањата на општинските програми.

Одговарајќи на советничките прашања, градоначалникот Петар Јанков ги образложи тековните и планираните проекти, финансиското работење и предизвиците со кои се соочува општината.

Општината постепено ја стабилизира финансиската состојба и создава услови за поинтензивна реализација на планираните активности.

На седницата се донесе и одлуки за унапредување на комуналните услуги, работењето на јавните претпријатија, урбанистичкото планирање и поддршка на граѓани на кои им е потребна парична помош.

,,Продолжуваме со одговорно управување, реално планирање и конкретни чекори за развој на Струмица“ – истакна градоначалникот Петар Јанков.

Прочитај повеќе

Струмица

Ново мултифункционално игралиште во Куклиш

Media Press

Published

на

НОВО ИГРАЛИШТЕ ЗА СПОРТОТ ВО КУКЛИШ: Завршена подлогата и поставени кошевите на новото мултифункционално игралиште

Љубителите на спортот и рекреацијата од населеното место Куклиш добиваат современо уреден спортски простор. Активностите за целосно уредување и модернизација на мултифункционалното спортско игралиште во ова населено место се во забрзана реализација, соопштија од Општина Струмица.

Според досегашните изведувачки работи, подлогата на игралиштето е успешно завршена, а веќе се монтирани и кошевите, со што проектот добива видлива завршна форма.

Проектот е замислен како мултифункционален спортски терен кој ќе овозможи практикување на повеќе спортови, со што ќе се создадат оптимални услови за спортски активности на младите, децата и сите рекреативци од Куклиш.

Оваа значајна инвестиција се реализира преку меѓусебна соработка и партнерство меѓу Општина Струмица и „Видеолотарија Касинос Австрија“. Овој заеднички потфат е дел од пошироката стратегија за унапредување на спортската инфраструктура и рамномерен развој на условите за спорт и рекреација во сите населени места низ општината.

Прочитај повеќе