„Новогодишната кошница“ денеска завршува. Дали беше успешна, или промашена?
Денеска
завршува акцијата Новогодишна кошница која што беше креирана на предлог на
бизнисот со поддршка на Министерството за економија и труд и траеше од 15
декември 2024 година до 15 јануари 2025 година.
Главната цел
на Новогодишната кошница која што беше креирана од бизнисот односно
производителите, дистрибутерите и трговците, беше да се креира поширока листа
на одделни прехранбени производи кои што се ставија со намалени цени на
рафтовите.
„Со истата се спречи зголемување на цените пред и за новогодишните и божиќните празници и се одржа стабилно ниво на инфлацијата во месец декември 2024 и месец јануари 2025 година, за време на новогодишните и божиќните празници кога има зголемена потрошувачка.
На листата
на производи, како што е објавено и на веб-страната Моја кошница која што
Министерството за економија и труд ја креираше токму за оваа акција се клучија 1178 производи од 96 производители и дистрибутери се
вклучија 51 маркети, а акцијата се применуваше во 762 продажни места“, соопштуваат
од Министерството за економија од каде велат дека акцијата Новогодишна кошница била успешна.
„Според
Државниот завод за статистика од податоците за Индекси на трошоците на животот
и на цените на мало за декември се забележува дека инфлацијата во 2024 година
споредено со 2023 година изнесува 3,5% како што беше и проектирано. На месечно
ниво пак во декември 2024, споредено ноември 2024 година инфлацијата изнесува
0,3%“, велат од ресорното министерство.
Од СДСМ пак велат дека политиките со „кошнички“
се покажаа како целосно промашени
„Стандардот на граѓаните се влошува од ден на ден како последица од
погрешните економски политики на власта предводена од Мицкоски и ВМРО-ДПМНЕ.
Таканаречените „кошнички“ се покажаа како целосно промашување. Наместо да го олеснат животот на граѓаните, тие предизвикаа уште поголема скапотија и го срушија стандардот на граѓаните. Наместо да се намалт цените на основните производи се зголемија. Зејтинот, јајцата, шеќерот, млечните производи, грашокот, гравот и леќата, се е поскапено. Оваа сурова реалност граѓаните ја гледаат во маркетите и продавниците и ја живеат секој ден борејќи се со обезбедување на основните потреби за своите семејствата.
Последните податоци од Државниот завод за статистика покажуваат дека трошоците за живот во декември 2024 година се зголемени за 4,4%, а цените на основните производи пораснале за 4,3%. Се зголеми и инфлацијата, во декември 2024 година е за 4,4 проценти повисока. Овие податоци јасно укажуваат дека политиките на Мицкоски и ВМРО-ДПМНЕ се целосно промашени и погрешни.
СДСМ како одговорна партија предложи конкретни мерки за подобрување на животниот стандард на граѓаните: зголемување на минималната плата, укинување на ДДВ за основните производи за реално намалување на цените и покачување на платите во повеќе сектори“, велат од СДСМ.