Обезбеди 60.000 вакцини против сезонски грип, министерот Меџити утрово ја прими вакцината
Министерот за здравство д-р Фатмир Меџити утрово ја прими вакцината против сезонски грип на вакциналниот пункт за здравствени работници, кој е отворен во Институтот за јавно здравје. Истовремено министерот ги повикува заинтересираните граѓани да се пријават за вакцина.
„Ги повикуваме заинтересираните граѓани да се пријават на vakcinacija.mk и по смс порака ќе добијат термин. Годинава Министерството за здравство обезбеди 60.000 вакцини наменети за имунизација на ризичните категории на граѓани и здравствените работници. Вакцините за нив се бесплатни’, соопштуваат од кабинетот на министерот.
Инаку вчера на 29 октомври, по повод Светскиот ден на борба со мозочен удар министерот за здравство д-р Фатмир Меџити, претседателката на Македонското невролошко здружение проф. д-р Драгана Петровска и претседателот на Македонското здружение по кардиологија проф. д-р Марјан Бошевски ја потенцираа важноста на превенцијата, лекувањето и поддршката на пациентите со мозочен удар.
Министерот Меџити порача дека е неопходно лекарите да ги едуцираат граѓаните преку соработка со медиумите, а заложбата негова како министер е преку предлагање и поддршка на законодавни и економски мерки да се овозможи квалитетен и здрав живот на граѓаните.