Весели и насмеани со растреперени срца, дечињата од градинките и од основните училишта, ќе се возат на новогодишниот детски воз низ улиците на Радовиш, се до Нова година. Новогодишниот фестивал „Светол град -2022“, авторско дело на стручниот тим од Центарот за култура „Ацо Караманов“, годинава е збогатен со дополнителен апликативен труд „Детска зимска бајка на воз“.
„Со тргнувањето на специјалниот детски новогодишен воз, официјално ја започнуваме новогодишната програма за дочек на новата 2023 година“ најави и Општина Радовиш која е покровител на манифестацијата „Светол град-2022“.
Вчера Градоначалникот Ацо Ристов ги пречека првите патници на новогодишниот воз и им додели новогодишни подароци, посакувајќи им многу среќа и здравје во новата 2023 година.
Детскиот воз и денеска поминуваше пред општината каде патниците ги добиваа своите подароци.
„Светол град“ и годинава се организира под покровителство на Општина Радовиш, градоначалникот Ацо Ристов и Советот на Општина Радовиш. Организацијата е доверена на центарот за култура „Ацо Карманов“ а во соработка со општинските основни училишта и детската градинка.
На граѓаните а особено на најмладите, ќе им биде понудена разновидна програма.
Во центарот за култура ќе биде прикажана театарската претстава за деца Новогодишна сказна, кино проекција за деца Биби и Боби во Снешковград и кино проекција за возрасни Надеж, Кајмак и Небеса. Балетска претстава на „Газели“ и празничен концерт на ФА Ацо Караманов и пријателите.
Новогодишниот фестивал „Светол град“ започнува од 26 декември со претставување на сите општински училишта и детските градинки од Општина Радовиш. На 28 ќе се одржи концерт на Троја и концерт на Александра Јанева и на 29 декември концерт на Дајте Музика.
Ќе има и изложувачи на рачни изработки, колачи и десерти на новогодишните куќички и топли пијалоци во текот на програмата. Група ученици, денеска беа дел од организираната работилница на ЦК Ацо Караманов за изработка на украси и креации за украсување на просторот, каде што ќе се одржуваат сите настани од богатата програма во дворот на поранешниот факултет во Радовиш.