На 28 октомври, 2022 година, Советот на Општина Гевгелија ќе ја одржи својата 16 седница. На оваа седница, ќе биде разгледана Предлог-Одлуката за склучување Договор за долгорочен кредит помеѓу Општина Гевгелија и Комерцијална банка АД Скопје за реализација на капитален инвестиционен проект. Станува збор за долгорочно задолжување на Општина Гевгелија, со намена за проектот „Изградба на водоводна, фекална и атмосферска канализациона мрежа на улица „Св. Климент Охридски“ во Гевгелија.
Покрај ова, на седницата ќе уследат и разгледувања на неколку одлуки од областа на урбанизмот, за утврдување на Нацрт-Детален урбанистички план за Урбан блок 15.11, општина Гевгелија и Предлог-Одлука за прекинување на постапката за донесување на УП вон населено место за индустриска зона „Билото“ КО Прдејци, како и неколку иницијативи од баратели за изработка на Урбанистички планови и утврдување на правен статус на бесправно- изградени објекти.
На дневниот ред за 16 седница се предвидени и носењето Предлог-Одлука за доделување стипендии на талентирани ученици од општина Гевгелија, запишани на Медицинските факултети за академската 2022/2023 година, разрешување стар и именување нов член во Општинскиот совет за превенција на детско престапништво и во Управниот одбор на ЈПКД „Комуналец“- Гевгелија. Предмет на расправа ќе биде и Годишниот план за вработување за 2023 година на ЈОУ Дом на култура „Македонија“- Гевгелија, а пред Советот ќе уследи и информација за состојбата со дивите депонии на подрачјето на општина Гевгелија.
Седницата ќе биде одржана во Малата сала на Народниот театар- Гевгелија, со почеток во 10:00 часот.