ЈП Плаваја Радовиш пред официјалното започување на зонското паркирање во градот се соочуваат со проблеми околу оштетување на поставените тебли и сообраќајна сигнализација на улиците кои се обележани за зонско паркирање. Граѓаните од различни причини негодуваат на овој проект и тоа го искажуваат со уништување на таблите.
Од тие причини ЈП Плаваја излезе со известување до граѓаните во кое се вели:
„Во согласност со одлуките на Советот на општина Радовиш и одобрениот сообраќаен проект, ЈП”Плаваја” во рамките на своите надлежности меѓу кои спаѓаат и јавните паркиралишта во согласност со Законот за комуналните дејности, формира организациона структура на ниво на Одделение за јавни паркинзи кое ќе ги спроведува одлуките и правилниците во врска со начинот на користење и паркирање на јавните паркинзи во Радовиш, усвоени од страна на Советот на општина Радовиш на предлог на Градоначалникот на општина Радовиш Ацо Ристов.
Во соработка и постојана комуникација со Градоначалникот и општинската администрација, во изминатиот период направена е хоризонтална и вертикална сообраќајна сигнализација на локациите на кои е планирано зонското паркирање.
Во последните денови се поставуваат и информативните табли за начинот на паркирање (кои патем веќе ги оштетувате, вртите и на разни начини ја искажувате својата “креативност” во уништување на таблите, нешто што е обврска на општината и нејзините јавни претпријатија да го уредуваат јавниот простор, а на Вас кои сте над законот тоа ништо не Ви значи).
Поставувањето на информативните табли не значи и почеток на зонското паркирање туку подготовка за негово започнување.Сите правни и технички работи се во завршна фаза и Вие како крајни корисници ќе бидете навреме информирани за официјалниот почеток на зонското паркирање. Дотогаш Ве замолуваме да не ширите дезинформации и да не подлегнувате на улични муабети во врска со зонското паркирање. Единствена цел на зонското паркирање е решавање на сообраќајниот хаос и сообраќајната некултура кои за жал постојат во нашиот град и општина и најважно од се да не ја уништувате вертикалната сигнализација бидејќи нанесувате само штета, на таа локација ќе се постави нова табла или нов сообраќаен знак.
Ниту еднаш намерата ниту пак целта не била и не е богатење на грб на граѓаните или остварување на приходи, приходите и расходите се јавни и секогаш достапни преку објавување на финансиските извештаи на нашата интернет страница. Време е да покажеме дека имаме општествен и културен капацитет и како цивилизирани жители на оваа општина да започнеме да се однесуваме како што доликува и кон прописите и кон урбаната средина“, стои во известувањето и реакција од ЈП Плаваја во врска со актуелниот проект „Зонско паркирање“ кој предизвика различни реакции кај граѓаните.
Инаку пред неколку дена на последната седница на Совет, советниците го изгласаа ценовникот за паркирање и според него ќе се плаќа по 30 денари од час во прва зона и по 20 денари од час за втора паркинг зона. Граѓаните кои што немаат услови за сопствен паркинг ќе плаќаат по 300 денари месечно или по 3.600 денари годишно и ќе имаат право да се паркираат било каде на улицата на која што живеат, каде ќе има слободно место. Доколку имате и второ возило за него ќе платите 500 денари месечно или 6.000 денари годишно. А за резервирање на паркинг пред вашиот дом или деловен објект тоа ќе ве чини 40.000 денари годишно.