Иако со намалени средства за украсување на градот, новогодишниот амбиент во Радовиш сепак се чувствува. Скромно но сепак убаво изгледа централното градско подрачјето, годинава збогатено и со Новогодишен базар во организација на центарот за култура „Ацо Караманов“, а под покровителство на Општина Радовиш. Се продаваат рачни изработки, украси, домашен мед и други ракотворби.
Повеќето од радовишани новата година ќе ја дочекаат во домашен амбиент, колективно ќе ја паметат оваа година по Ковид пандемијата.
За следната 2022 година речиси идентични желби, да заврши
короната, повисоки плати за поубав живот на сите и повисок стандард.
Во рамките на новогодишната програма вечерва на плоштадот „Свети Спасо Радовишки“ ќе биде организирана средба со Дедо Мраз, а Новогодишниот базар ќе продолжи со музичка програма. Утре на последниот ден од оваа година, од 11 до 15 часот на плоштадот во Радовиш ќе се делат топли напитоци и подароци од Дедо Мраз, во организација на Центарот за култура, подржано од Општина Радовиш.