Одржана Конститутивната седница на Советот на Општина Радовиш, кој се новите советници?
Денеска беше одржана Конститутивната седница на новиот Совет на Општина Радовиш со што 19-те советници избрани на Локалните избори, практично започнуваат со работа. Конститутивната седница која се одржа во Центарот за култура „Ацо Караманов“ во Радовиш, ја започна претходниот претседател Викица Манолева, а за нов претседател на Советот беше избрана Моника Ристевска од мнозинскиот состав на ВМРО -ДПМНЕ со коалицијата.
Градоначалникот на Општина Радовиш Ацо Ристов во денешното обраќање кон советниците им порача да ги заборават партиските определби и да работат во интерес на граѓаните.
Верификационата комисија врз основа на доставените докумети го верифицира мандатот на сите 19 советници: Аница Бораниева Атанасова, Вучковски Дејан, Гавритов Страхил, Илиев Трајанова Александра, Илиев Игор , Конзулов Весна, Коцева Верица, Костадинов Илче, Кулашиќ Александар, Лукаров Јован, Николов Панче, Омер Енис, Почивалец Љупче, Ристевска Моника, Ристов Ванчо, Ристова Каролина, Сусинов Илија, Трајкова Христова Зорка и Цветановски Симона.
Советниците на денешната
седница дадоа и свечена заклетва дека ќе работат во интерес на граѓаните, по
што ја потпишаа свечената изјава.
На крајот на конститутивната седница беше донесена Предлог -одлука за именување на членови на Комисијата за мандатни прашања, избори и именувања, и Предлог- одлука за определување на членови на Советот кои учествуваат во постапката за склучување бракови.