Директорот на Агенцијата за филм, Бојан Лазаревски и продуцентот Владимир Анастасов го посетија отворенит сет за филмот „Зад стоговите сено” кој во моментов се снима на локации низ Дојран.
„Оваа значајна соработка стана реалност, благодарение на Преспанскиот договор, и истата претставува размена на искуства помеѓу две филмски екипи, на две територии, отсликувајќи ги двата народа во создавањето на најголемото достигнување – филмско дело. Се надевам дека оваа соработка помеѓу соседите ќе се продлабочи и развива и во иднина, вклучувајќи ги сите останати сегменти од културното творење“, кажа Лазаревски.
Почесниот Конзул на Република Грција во Северна Македонија Ахилес Ракинас се заблагодари за поканата да присуствува на снимањето на филмот „Зад стоговите сено“, проект кој е од големо значење за двете земји.
„Љубител сум на филмот, ја следам продукцијата од целиот регион, се чувствуваат успесите, затоа верувам дека и овој филм ќе остави белег. Се надевам на идни соработки во секоја област не само во филмот“, рече Ахилес Ракинас.
Снимањето на филмот се одвивa на територија на Грција уште од 13 јануари, а потоа продолжи на локации во Дојран и Гевгелија, но поради настанатата ситуација со КОВИД-19 и воведувањето на карантин, стратегијата е променета за снимањето на овој филм којшто сепак успеа да биде комплетиран на сетовите на македонската страна од Дојранско Езеро.