Д-р Добринка и главната сестра Габриела од Инфективната клиника први ја примија вакцината против КОВИД-19
Од денеска започна имунизацијата во државата. Вакцинирани 107 медицински лица на инфективната клуника во Скопје со Фајзер вакцината од Србија. Д-р Добринка Наунова Јовановска и главната сестра Габриела Темелковска од Инфективната клиника први ја примија вакцината против КОВИД-19.
„Со нив, го почнавме процесот на имунизација во земјава. Тие се медицински лица со значајно искуство и огромен придонес во борбата против вирусот. Им се заблагодарувам за пожртвуваноста во целиот изминат период грижејќи се неуморно за нашите пациенти, деца, роднини и пријатели. Во знак на почит, вакцинацијата ја почнуваме токму со здравствените работници од ковид центрите. Ги заштитуваме затоа што се во првите борбени линии и ни се потребни во работата!“ соопшти министерот за здравство Венко Филипче.
Д-р Добринка и главната сестра Габриела се чувствуваат добро и упатија порака дека ова е единствениот начин за да ставиме крај на пандемијата.
„Ја примив вакцината и се чувствувам одлично. Аплицирањето на вакцината е безболно. Порачувам секој да прими вакцина, по сопствен избор секако. Но тоа е единствениот начин да се заштитиме од инфекцијата со која се соочуваме цела година, со која целиот свет се бори, па и ние сосем добро. Втората доза ја примам за 21 ден. За мене ќе биде една голема сигурност тоа што сум примила вакцина и веројатно ќе бидам заштитена многу повеќе од оние кои нема да го сторат тоа“, изјави примариус д-р Наунова Јовановска – специјалист за неуроинфекции од Клиниката за инфективни болести и фебрилни состојби.