ИЈЗ: Трендот на намалување на бројот нови случаи продолжува
Институтот за јавно здравје во својот извештај за период 24-30 август 2020 известува дека има намалување од 10,6% на материјалите за тестирање во лабораториите однос на минатата недела. За изминатата недела има нови 666 позитивни случаи од 29 градови што е намалување од 20,6% во однос на минатата недела.
Регистрирани се заболени лица во сите возрасни групи. Најзастапена е возрасната група на лица над 60 години со 158 позитивни односно 23,7%. Голем број на заболени се регистрира и кај лицата на возраст од 30-39 (20,7%), 50-59 (18,3%) и 20-29 (17,0%). Најмал број е регистриран кај децата од 0-9 (1,8%) и 10-19 години (4,7%).
Во однос на дистрибуцијата по пол, пријавени се 288 (43,2%) лица од женски и 378 (56,8%) од машки пол.
Од случаите кои се епидемиолошки истражени (98,6%), регистриран е 71 (10,7%) хоспитализиран (намалување од 40,3% во споредба со минатата недела), а кај 195 (29,6%) лица е регистрирано присуство на коморбидитети.
Од вкупниот број на нови случаи, 212 (32,2%) имаат контакт со потврден случај. Регистрирани се 24 лица со историја на патување (во последни 14 дена).
По добиени 2 негативни теста за присуство на SARS-CoV-2 или со употреба на новиот алгоритам, како оздравени се водат 1.112 лица кои биле хоспитализирани или на домашно лекување.
Пријавени се 35 смртни случаи од 13 градови, зголемување од 84,2% во однос на минатата недела. Во однос на возраста, 26 биле над 60 години, 5 на возраст од 50-59 и 4 на возраст од 40-49 години. Сите починати биле хоспитализирани. Коморбидитети се регистрирани кај 29 починати лица.