Околу 180 ученици кои ја избраа радовишката гимназија како свој избор за да го темелат своето идно образование, денеска за прв пат влегоа во просториите на СОУ Коста Сусинов во Радовиш и беа срдечно пречекани како од вработените така и од своите соученици.
Први септември симболика на нов почеток, на нова шанса, на нова надеж. Почеток на ново поглавје од својата ученичка приказна, полна со труд, соништа, пријателства и успеси.
„Наши идни средношколци, од денес станувате дел од нашето училишно семејство, чувствувате возбуденост, можеби и мала доза на несигурност, но бидете сигурни дека овде ќе го пронајдете вашиот втор дом. Очекувајте нови другарства, нови искуства и нови хоризонти што ќе ви ја отворат патеката кон зрелоста. Посакувам да се продолжи со истата енергија и упорност со која досега чекореа учениците во нашето училиште. Средното образование е повеќе од оцени – тоа е градење на карактер, истрајност и личен развој. Искористете го времето мудро, оставете трага и бидете пример за другите. Училиштето е место каде што се учиме на живот. Место каде што откриваме како да бидеме чесни, одговорни, истрајни. Знаењето кое ќе го стекнете овде е ваше и никој никогаш нема да може да и го одземе, а вредностите кои ќе ги понесете се вашиот компас во животот.Среќен почеток на новата учебна година“, и посакаа од училиштето на идните средношколци.