Отворен првиот агротуристички сместувачки капацитет во југоисточна Македонија, во струмичко Габрово, првите гости од Холандија
Општина Струмица започна да го развива агротуризмот. Отворен е првиот агротуристички сместувачки капацитет во југоисточна Македонија, и тоа во струмичко Габрово и првите гости пристигнаа од Холандија.
„Денеска се ставени темелите на агротуризмот во Струмица. Отвараме нова страница на можностите и потенцијалите на Струмица! Нашата убава Струмица нуди широки можности за реализација на идеи кои ја прават атрактивна и посакувана дестинација за домашните и странските посетители. До прекрасното село Габрово познато по својата природа и Габровските водопади денеска беше отворена хациендата Лоуисандро, првиот агротуристички сместувачки капацитет во југоисточна Македонија. Ова е дело на нашиот струмичанец Васко Кoциров кој по повеќе од 20 години работа во Холандија се врати во Габрово“ вели градоначалникот на Општина Струмица Костадин Костадинов, кој денеска беше присутен на отворањето на овој атрактивен агротуристички комплекс.
Пристигнаа и првите туристи од Холандија и заедно со нив, со амбасадорката на Холандија во Македонија Н.Е Узлем Џанел и домаќините, прошетаа низ селото и уживаа во новата и разновидна понуда на хациендата Лоуисандро која располага со 7 соби и повеќе содржини за спокоен престој и релаксација и здрава домашна храна типична за ова поднебје од сопствено производство.
-Целта на овој нов тренд на агротуризам е враќање во руралните средини од современите динамични градски средини и уживање во даровите од природата, вели Костадинов кој посака среќа и да се множат туристичките капацитети од ваков вид и да се полнат со гости.