Одбележан Светскиот ден за борба против дијабетес во Радовиш
Во присутво
на поголем број заинтересирани граѓани,бесплатно
мерење на шеќерот во крвта и едукативно предавање организира Здравствен дом -Радовиш
по повод Светскиот ден за борба со дијабетесот, 14 ноември. Активноста се одржа
во соработка со здружението на дијабетичари од општините Радовиш и Конче, во
просториите на ОНБ Браќа Миладиновци во
Радовиш.
Едукативното предавање го одржа д-р Панче Николов од Здравствениот дом во Радовиш, специјализант по интерна медицина. Тој ги запозна присутните околу мерните единици на шеќерот во крвта, типови на дијабетес, симптомите, лекувањето и ризик факторите кои допринесуваат до појава на дијабетес.
Дијабетесот е хронично заболување за кое сепак, постои третман преку
инсулинска терапија и постојано следење на состојбата.
Вложувањето во иновации за третирање дијабетес вклучуваат и напредни методи на внес на инсулин со подолготрајно дејство, помала потреба од користење на инјекции и боцкање.
И
покрај јавните кампањи за подигнување на свесноста кај населението и
медицинските иновации кои го подобруваат квалитетот на живот и натаму
дијабетесот е се повеќе распространет. Се проценува дека од ова нарушување страдаат
над 530 милиони луѓе ширум светот.
Според прогнозите на СЗО до крајот на 2030 година околу 650 милиони луѓе ќе бидат дијабетичари. Речиси половина од заболените поминуваат долго време без соодветна дијагноза, односно не ги контролираат и не реагираат на раните знаци на дијабетес.