Денеска е Света Троица или Духовден – Слегувањето на светиот дух врз апостолите
Денеска се празнува Света Троица или Духовден – Слегувањето на светиот дух врз апостолите, празник на црквониот храм Света Троица во Радовиш. По тој повод беше одржана свечена Архиерејска литургија.
Духовден (Дуовден) или Педесетница е подвижен празник, еден од најголемите 12 христијански празници — еден од најсветите празници во христијанството во кој се слави слегувањето на Светиот Дух врз апостолите на педесеттиот ден од Христовото воскресение. Овој настан претставува исполнување на старозаветните месијански пророштва.
Педесетницата се нарекува уште и „крај на празниците“, ден преку кој се довршува историјата на Спасението остварено преку Исус Христос токму поради тоа што православното учење како една од службите на Месијата го назначува токму крштевањето преку Светиот Дух, односно Негово излевање врз човештвото. Иако Духот делува и пред и по Педесетницата, на овој ден Тој се покажува во Својот ипостас, а сѐ со цел самата историја на Спасението да се направи совршена. На овој ден започнува икономијата на Светиот Дух, Тој е Оној Кој го собира Божјиот народ во телото Христово, односно Црквата.
На големиот празник на Светата Троица, народот традиционално ги посетува црквите и манастирите со исто име и бара прошка од гревовите или лек за болести.