Радовишките тутунари незадоволни, велат проценката е реална, но цените не ги покриваат трошоците
Радовишките тутунари незадоволни од цената по која се откупува тутунот иако таа годинава е зголемена во споредба со лани за околу 20%. Откупот на тутунот во радовшко кој започна од пред неколку дена, се одвива на пет – шест откупни пункта и како што денеска ни изјавија тутунарите ги продаваат првите количини тутун, кој е со добар квалитет и очекуваат добра класа. Според сегашните цени просекот досега им доаѓа по 280 денари за килограм тутун и како што велат не им ги покриваат трошоците.
– Досега предадов околу 200 килограми тутун. Задоволен сум од проценката, но не сум задоволен од откупната цена по класи. Според трошоците, просекот не треба да биде под 400 денари за килограм бидејќи цените на сите производи драстично се зголемени“ вели производител на тутун од радовишки Прналија, кој чекаше ред за на вага, да го продаде донесениот тутун.
Инаку цените на класите годинава имат мало зголемување, односно прва класа тутун се откупува по цена од 300 денари за килограм, втора класа по 240 денари за килограм и трета класа за 180 денари за килограм тутун. Но тутунопроизводителите велат дека тоа не е доволно.
Годинашната реколта во земјава е договорена на над 25 000 тони, но се очекува да биде помала, иако е поголема од ланската и е поквалитетна.
Пред почеток на откупната сезона како што информира министерот Љупчо Николовски, одржале состанок со откупувачите на тутун, кои го информирале дека се подготвени за навремено да почне откупот, со обезбедени средства и подготвени откупни места. Оваа година рече министерот има добар квалитет на тутунот и очекува минимум 20 отсто зголемување на откупната цена.