Започна проектот „Зонско паркирање“ во Радовиш, со обележување на хоризонталната сигнализација
Општина Радовиш ќе го решава проблемот со неконтролираното паркирање по улиците во градот, кој се провлекува со години. Се паркира кој каде ќе стигне, на тротоар, на велосипедска и пешачка патека, на улица пред влезни врати на приватни куќи, пред влезови во училишта и други јавни установи. Конечно овој проблем ќе се решава и ќе се става ред во сообраќајниот хаос.
Започна проектот „Зонско паркирање“ во Општина Радовиш, со обележување на хоризонталната сигнализација, односно обележување на сите утврдени паркинг места и пешачки премини, согласно сообраќајниот проект. Исто така ќе бидат поставени и сообраќајни знаци согласно проектот и новиот режим на сообраќај во Радовиш.
Целта е решавање на еден од најголемите проблеми со кои се соочува Општина Радовиш веќе подолго време.
„Преку проектот „Зонско паркирање„ очекуваме да се реши преголемата оптовареност на сообраќајот во нашата општина а со тоа и регулирање на постоечките паркинг места и целосно ставање под контрола на паркирањето во градот“ вели градоначалникот Ацо Ристов.
Со цел обележувањето да се одвива непречено и ефективно, од општината апелираат до граѓаните во овој момент е да не паркираат каде што е планирано да се врши обележувањето.
„Со ваша помош да успееме да ставиме ред во сообраќајот и заедно да го решиме проблемот со паркирањето во нашата општина“, стои во апелот од општината.