Пронајдено е исчезнатото дете од с. Јаргулица, кое се бараше од синоќа, по пријавувањето во полиција
Денеска (23.03.2022) околу 10.30 часот во атар на с.Покрајчево, радовишко, полициски службеници од Полициската станица Радовиш го пронашле малолетникот Д.И.(9) од с.Јаргулица, радовишко.
Синоќа во 22.20 часот во Полициската станица Радовиш, неговиот татко Љ.И.(41) пријавил дека тој се оддалечил од домот.
„Веднаш по пријавувањето, полициски службеници од Полициската станица Радовиш, екипа од Територијалната противпожарна единица и граѓани започнале пребарување на теренот и денеска малолетникот бил пронајден во добра здравствена состојба“, информира портпаролот на СВР Струмица, Полициска станица, Радовиш.
Во врска со овој случај денеска беше одржан вонреден состанок на Штабот за заштита и спасување на Општина Радовиш по добиената информација и пријава за исчезнато малолетно лице на 22.03.2022 година околу 21:45 часот.
Началникот на Штабот Љупче Почивалец информираше за настанатата ситуација и превземените мерки за пронаоѓање на исчезнатото малолетно лице. На состанокот беа присутни именуваните членови на Штабот за заштита и спасување на општина Радовиш, и поканетите лица од повеќе институции во општината. За време на состанокот беше добиена информација дека е пронајдено малолетното лице веднаш по преземените активности.