Пратеничката група на ВМРО-ДПМНЕ ќе поднесе Предлог закон за изменување и дополнување на Законот за тутун по скратена постапка.
„Со постоечкиот Законот за тутун кој бил изменет во 2019 година во овие неколку години има големи проблеми со откупот. Со континуирани комуникации со тутунопроизводителите дојдовме до предлог промена на законот за тутун и тутунски производи со тоа што би се забранил увоз на надворешен тутун се додека не се откупи и последниот килограм тутун од домашно производство. Со тоа би ги заштитиле тутунопроизводителите, чии што живот и егзистенција зависи од тутунот. Не е проблем со увозот на тутун што легално се увезува, но имаме информации дека и лани, а и годинава, дека се дозволува огромен шверц на тутун од Бугарија и Албанија, се носи тутун по многу евтина цена и плус за тој тутун се зема и субвенција“, велат од пратеничката група на ВМРО -ДПМНЕ.
Целта на предлог законот кој ќе го поднесат како што велат од пратеничката група е да се надминат проблемите и да се обезбеди правна сигурност за откупот на тутунот и покрај поднесениот приговор и да се допрецизира третманот на неферментираниот тутун, притоа ги повикаа пратениците од парламентарното мнозинство да дадат подршка на измените на законот.