Од денеска почна вакцинацијата со кинеската вакцина „Синовак“, во вакциналните пунктови низ државата меѓу кои и во Здравствениот дома во Радовиш, откако истата ги помина сите потребни законски процедури, соопштија од Министерството за здравство.
Како што дознаваме од Здравствениот дом во Радовиш добиени со 700 дози вакцини Синовак и од денеска започнаа да се аплицират на сите пријавени согласно закажаниот термин. Исто така тим од Здравстениот дом во Радовиш врши и вакцинација на терен со вакцината Астра Зенека, на возрасни лица над 60 годишна возраст. Од вчера се посетени Конче и Ракитец, денеска во Подареш, а во наредниот период ќе се продолжи во други населени места.
Што се оденсува до вакцината Синовак, како што соопштуваат од Министерството, станува збор за класична вакцина каде е инјектиран ослабен вирус односно технологија за добивање вакцини која се користи децении и е многу позната, па оттука и разбирливо е што широката популација ја доживува како една од најбезбедните платформи за производство на вакцини. Во однос на возраста на којашто се дава, вакцината „Синовак“ нема ограничување во Кина и се аплицира и кај деца над 3 годишна возраст.
И во Струмица започна вакцинацијата со кинеската Синовак. Пристигнати се 3000 дози од кои околу 600 веќе се аплицирани.
„Оваа вакцина кај нас ќе се користи над 18 години и без ограничување на возраста кај возрасните лица. Вакцината „Синовак“ се препорачува и за доилки и трудници “, нагласуваат од министерството за здравство.
Вчера вкупно се вакцинирале 12.994 граѓани, а прва доза вакцина вчера примиле 11.220 граѓани.
Бројот на лица кои изразиле желба за вакцинација преку веб платформата е 469.212 граѓани.