Според последните анализи на МАНУ новиот британски сој на КОВИД-19 не е детектиран во земјава, информира министерот за здравство Венко Филипче.
„Овие наоди се базирани на податоците од нивната лабораторија во периодот од јуни 2020 до 11 јануари 2021 година. Досега се анализирани близу 180 вирусни геноми, при што е утврдено присуство на 20-ина соеви на вирусот. Од присутните соеви на вирусот, два се доминантни во нашата популација, присутни кај повеќе од 75% од пациентите“, вели Филипче.
Новиот сој беше откриен и во Шведска, Франција, Германија и Шпанија, како и во Хрватска и Словенија, а од вчера и во Србија.
Се претпоставува од искуството на Британија дека клиничката слика не е поразлична, но преносливоста е поголема. Ќе заболат повеќе луѓе, веројатно ќе има и повеќе починати.
„Истите мерки кои се преземаат за постоечкиот вирус функционираат и за британскиот сој. Треба маските поригорозно да се носат и дистанцата да се држи по внимателно. Ова не треба да не изненадува. РНК вирусите се нестабилни, мутираат многу често, вели епидемиологот д-р Драган Даниловски.
Досега во земјата се направени вкупно 442.600 тестирања на Ковид -19. Вкупната бројка на ковид дијагностицирани во нашата земја од почетокот на епидемијата изнесува 90654, бројката на оздравени пациенти е 78154, на починати е 2785, а бројот на активни случаи падна под 10000 и изнесува 9715.
Во текот на вчерашниот ден од 1466 тестирања, беа регистрирани 183 нови случаи на ковид-19, од нив 13 во Југоисточниот регион, во Струмица 3, во гевгелија 6 и во Радовиш и Богданци по 2 нови случаи.