Советот на Општина Радовиш конечно го усвои Предлог – Буџетот за 2021 година на денешната седница
Советот на Општина Радовиш на денешната 52 седница конечно го усвои Предлог- Буџетот за 2021 година. По неколкуте процедурални забелешки од страна на советниците уште на почетокот на седницата, сепак дневниот ред од 22 точки беше усвоен, по што со 10 гласа ЗА, беше усвоен и Буџетот на општината. Од страна на координаторот на советничката група на ВМРО-ДПМНЕ Бојан Митевски, беше побарано поединечно гласање, при што беше констатирано дека 10 советници гласаа ЗА, а 8 не гласаа. Вкупниот Буџет тежи околу 572 милиони денари.
По усвојувањто на истиот, беше изгласана и Предлог – Одлуката за извршување на Буџетот за 2021, како и Предлог – одлуката за утврдување на вредноста на бодот за платите на државните службеници за 2021 година.
Претходно беа усвоени и Предлог -Програмата за јавни потреби на спортот во општина Радовиш за 2021 година, како и Предлог Програмата за уредување на градежно земјиште, изградба, реконструкција на комунални објекти и локални патишта во Општина Радовиш за 2021 година. Потоа беше изгласан и предлог програмата за изработка на урбанистички планови, Предлог Програмата за локален економски развој на Општина Радовиш за 2021 година и други предлог одлуки.
Советниците од опозицијата не гласаа за дневниот ред ниту за Предлог -одлуките, поради тоа што сметаа дека Предлог- Буџетот претходно не бил разгледан на комисија и поради одредени забелешко кои ги имале на истиот.