Отворен летниот спортски камп во природа „Плачковица 2020“ во Радовиш
Од денеска летниот спортски камп „Плачковица 2020“ во Радовиш ја прими првата група ученици, кои ќе поминат едно поинакво и незаборавно искуство на планина.
Организатори на кампот се професорите по физичко образование Дарко Коцев и Наде Ристов. Според она што го дознаваме од организаторите во првата група има 44 деца, од 06 до 15 годишна возраст.
Во кампот се ангажирани и волонтери од Црвен Крст од Радовиш, како и алпинистот Зоран Мајсторски како познавач на планинарење.
Во програмата има предвидено палење логоров оган, спортски игри, адреналински парк, забава со песни и игри, друштвени игри и други активности со кои ќе им бидат исполнети овие три дена на децата во кампот.
Истиот е организиран поради ситуацијата со корона вирусот и неможноста да се замине на класичен одмор, па да им се понуди на младите еден друг вид на одмор на планина за кој организаторите се надеват дека ќе премине во традиција.
Кампот е сместен во склоп на планинарскиот дом Џумаја и ќе тре по три дена, петок, сабота и недела, три викенда по ред, а по потреба може да се органзира уште еден викенд. За учество во кампот се плаќа по 3000 денари со кои им е обезбедено превоз, шаторско сместување и храна за учесниците која се подготвува во планинарскиот дом Џумаја.
„Децата ги очекува незаборавно планинарско искуство“ велат органзиаторите кои ни ветија дека по викендот ќе ни го раскажат нивното прво искуство во летниот спортски камп во природа Плачковица 2020, како и искуството на децата.