Вицепремиерот и министер за одбрана Радмила Шекеринска денеска има обраќање на свеченоста по повод одбележувањето на 10 Јуни – Денот на воздухопловството во Македонија.
Во армиската касарна „Страшо Пинџур“ во Петровец, во рамки на свеченоста на овој ден се предвидени летови на армиска авијација, вклучително и редовна воздушна полициска патрола на НАТО со Ф-16 ловци што започна со македонското полноправно членство во Алијансата, а кое го реализира военото воздухопловство на Република Грција согласно техничките аранжмани.
Надлетувањето над градот Скопје со група на воздухплови, ќе се одржи од 12 до 13 часот. Планирано е да се лета во формација 3-2-2-2 од девет летала и тоа: три хеликоптери Ми-17 – водител на група, два хеликоптера Ми-24, два хеликоптери Bell-206 и два авиони ZLIN-242L.
„Се надеваме дека граѓаните на Град Скопје ќе уживаат во прелетот на воздухопловите на Армијата на Република Северна Македонија. Од името на сите припадници на Воздухопловниот ВИНГ, во време на светската пандемија од КОВИД-19, на граѓаните на Република Северна Македонија им посакуваме да останат во добро здравје и ведар дух, да ги почитуваат препораките за заштита, а на сите заболени им посакуваме поскоро оздравување и закрепнување“, стои во писмената изјава на мајор Сашо Павловски.