Во изминатите 24 часа се направени 1.272 тестирања, а се регистрирани 180 нови случаи на КОВИД – 19, информира министерот за здравство Венко Филипче на прес конференција. Најголем број од заболените се од Скопје – 109, потоа следува Куманово – 26, Дебар – 1, Штип – 15, Тетово – 12, Струга – 1, Велес – 1, Битола – 1, Охрид – 1, Гостивар – 8, Гевгелија – 2, Валандово – 1, Свети Николе-1, Неготино – 1.
Министерот Филипче, рече дека денеска, Институтот за јавно здравје регистрира 11 оздравени пациенти, во: Скопје – 6, Прилеп – 1, Велес – 4.
Тој информираше дека на Клиниката за инфективни болести и фебрилни состојби починал пациент од Куманово на 52 години и во Градската општа болница „8 – ми Септември“ починала пациентка од Скопје, на 68-годишна возраст.
Вкупната бројка на КОВИД-19 дијагностицирани во нашата земја, од почетокот на епидемијата изнесува 2.790, бројката на оздравени пациенти е 1.632, на починати е 149, а во моментов бројот на активни случаи во земјата изнесува 1.009.
На прес-конференцијата, Филипче информираше дека досега во земјата се направени вкупно 34.386 тестирања на КОВИД -19. Додека пак, од вкупниот број направени тестови во изминатото деноноќие 16 теста се во рамките на скринингот во градинки во Штип, каде нема позитивни на вирусот.
Во однос на состојбата со пациентите во инфективните оддели и болниците ширум државата, министерот истакна дека на Инфективната клиника, во изминативе 24 часа примени се 10 нови пациенти и од нив, пет се префрлени од ГОБ „8 – ми Септември“. Во моментов се хоспитализирани вкупно 53 пациенти, нема пациенти на механичка вентилација.
До утрово, во ГОБ „8 – ми Септември“ примени се седум нови, а вкупно хоспитализирани 27 пациенти. На респираторна машина се седуммина, a со потешка клиничка слика се уште шест пациенти.
Во болницата во Битола се хоспитализирани девет пациенти, а во болницата во Штип се хоспитализирани 19 пациенти. На инфективните одделенија во Охрид, Велес, Куманово и Прилеп се хоспитализирани 29 пациенти, позитивни и сомнителни на КОВИД – 19.