„Во врска со застојот
на македонските автопревозници на италијанско-словенечката граница, информираме
дека вчера се обезбеди конвој за одреден број македонски превозници, кои беа
придружувани од словенечката полиција и транзитираа преку словенечка територија
на пат кон крајната дестинација – РС Македонија.
Министерството за надворешни работи, со сите свои ресурси и напори, преку дипломатско-конзуларните претставништва во Љубљана и Загреб, се обидува да обезбеди што поскоро транзитирање преку словенечка и хрватска територија и безбедно враќање дома на сите наши превозници. Испративме и нота до словенечкото и хрватското МНР, со барање за што поскоро вклучување на македонските превозници (лесни возила, комбиња, автобуси и камиони) во следните планирани конвои од словенечка и хрватска страна. Во тој контекст, МНР Никола Димитров од утринските часови е во постојана комуникација со Министерството за надворешни работи на Словенија, кризниот штаб и амбасадорот Јазбец“ стои во соопштението од МНР во врска со настанатата ситуација со македонските превозници, како резултат на засилените мерки во регионот, за заштита и превенција од корона вирусот.
Од Министерството за надворешни работи на Словенија и
Словенечкиот кризен штаб известуваат дека најмалку 3000 превозници чекаат на
граничните премини на италијанско-словенечката граница и уверуваат дека
постојано организираат конвои, внимавајќи на правично учество на превозниците
од сите држави во регионот.