Вечерва на полноќ завршува увидот во Избирачкиот список за гласањето на предвремените парламентарни избори на 12 април. Дотогаш е отворена и можноста за проверка на податоците на избирачите, бришење или дополнување во Избирачкиот список. До завчера во подрачните оделенија и канцеларии на ДИК своите податоци ги провериле 7.526 граѓани.
Рокот за увид во Избирачкиот список и за пријавување на македонските државјани за гласање на изборите на 12 април завршува исто така на 11 март на полноќ. До вчер за гласање во дијаспората се пријавиле 5.052 македонски државјани во странство.
ДИК по барањата и
пријавите на граѓаните е должна да одлучи со решение во рок од 24 часа од денот
на приемот на барањето. Против решението со кое се одбива барањето, граѓанинот
во рок од 24 часа од приемот на решението може да поднесе тужба до Управниот
суд по електронски пат. По тужба, Управниот суд одлучува во рок од 24 часа од
приемот.
Од ДИК нагласуваат
дека на изборите ќе можат да гласаат само граѓаните со важечка лична карта и
пасош. Во спротивно тие нема да можат да го остварат правото на глас.
До 17 март до ДИК
треба да пристигнат и податоци за лицата од затворите, во притвор и во куќен
притвор, како и од МТСП за лицата кои се пријавиле за гласање во установи за
вонсемејно згрижување.
Избирачкиот список во кој
се извршени сите промени кои произлегле од јавниот увид, отпечатен во вид на
изводи, ДИК го заклучува најдоцна до 23 март.